Дүниежүзілік туберкулезге қарсы күрес күніне арналған іс-шара

2026 жылғы 3 наурызда университетте дерматовенерология кафедрасының фтизиатрия курсымен профессор-оқытушылар құрамы (фтизиатрия курсының меңгерушісі, проф. Смаилова Г.А., Сагинтаева Г.Л., Арбузова Е.В., Игликова Ш.К., Туйебаева Б.Т.) Дүниежүзілік денсаулық сақтау ұйымы бастамасымен жыл сайын 24 наурызда атап өтілетін Дүниежүзілік туберкулезге қарсы күрес күніне орай ағартушылық іс-шара өткізді. Кездесу барысында туберкулездің алдын алу, ерте анықтау және заманауи емдеу әдістеріне қатысты өзекті мәселелер қарастырылды. Аурудың эпидемиологиялық жағдайына, даму қауіп факторларына, флюорографиялық тексеруден уақтылы және тұрақты түрде өтудің маңыздылығына, сондай-ақ дер кезінде медициналық көмекке жүгінудің қажеттілігіне ерекше назар аударылды. Оқытушылар жастар арасында өз денсаулығына жауапкершілікпен қарауды қалыптастырудың, медициналық сауаттылықты арттырудың және салауатты өмір салтын ұстанудың маңызын атап өтті. Іс-шара барысында ақпараттық материалдар ұсынылып, ашық пікірталас ұйымдастырылды және студенттердің сұрақтарына жауап берілді. Өткізілген іс-шара білім алушылардың туберкулез мәселесі бойынша хабардарлығын арттыруға, медициналық білім берудің профилактикалық бағытын күшейтуге және қоғамдық денсаулықты сақтау мәселелерінде белсенді азаматтық ұстанымды қалыптастыруға ықпал етті.