Қазақстан-Ресей медициналық университетінде «Medical Artistry» анатомиялық сурет байқауы жеңімпаздарын марапаттау рәсімі өтті
2026 жылғы 28 сәуірде Қазақстан-Ресей медициналық университетінде Сяньян кәсіби-техникалық институтымен бірлесіп ұйымдастырылған қытай-қазақ анатомиялық сурет байқауы «Medical Artistry» жеңімпаздарын марапаттау рәсімі өтті. «Бейнелеу анатомиясы» пәні ректор Жайнақбаев Нұрлан Темірбекұлының бастамасымен әзірленіп, 2022 жылдан бастап элективті пән ретінде жоғары оқу орнының компонентіне енгізілген. Бұл пән адам анатомиясын көркемдік дағдылармен ұштастырып, студенттердің кеңістіктік ойлауын, ұқыптылығын және адам денесінің құрылымын кәсіби тұрғыдан түсінуін дамытуға ықпал етеді. «Medical Artistry» байқауы медициналық анатомия саласындағы студенттердің шығармашылық және кәсіби дағдыларын көрсетуге арналған халықаралық алаңға айналды. Іс-шараға Қазақстан мен Қытай студенттері қатысып, авторлық анатомиялық суреттер мен көркем жұмыстарын ұсынды. Марапаттау рәсіміне Сианьян кәсіби-техникалық институтының өкілдері, сондай-ақ Оңтүстік Калифорния университетінің өкілі Коллин Крафт қатысты. Байқау жеңімпаздары мен жүлдегерлері жоғары дайындық деңгейі, шығармашылық көзқарасы және жұмыстардың кәсіби орындалуы үшін дипломдармен және ақшалай сыйлықтармен марапатталды. Осындай халықаралық іс-шараларды өткізу академиялық ынтымақтастықты нығайтуға, студенттердің шығармашылық әлеуетін дамытуға және медициналық білім беру саласындағы халықаралық білім беру байланыстарын кеңейтуге ықпал етеді.
