КРМУ-да студенттер қатарына қабылдау салтанаты өтті: дәрігерлік жолға алғашқы қадам!

Қазақстан-Ресей медициналық университетінде 1-курс студенттерін студенттер қатарына қабылдауға арналған салтанатты іс-шара өтті. Мерекенің ең маңызды сәттерінің бірі — бірінші курс студенттерінің студенттік анты болды. Бұл сәт болашақ дәрігерлердің таңдаған мамандығына деген адалдығын, білімге деген ұмтылысын және адам өмірі мен денсаулығына жауапкершілікпен қарауға дайындығын білдірді. Іс-шара барысында университет ректоры, профессор Нұрлан Темірбекович Жайнақбаев студенттерге құттықтау сөз сөйлеп, жаңа өмір кезеңінің басталуымен құттықтады. Сондай-ақ білім жолында табыс, кәсіби қалыптасу және болашақта білікті маман болу жолында сәттілік тіледі. Салтанатты рәсімге ерекше мән берген сәттердің бірі — Гиппократтың бейнесі болды. Ол дәрігерлік мамандықтың символы ретінде даналықты, адамгершілікті, кәсіби жауапкершілікті және медицинаға адал қызмет етуді бейнеледі. Мерекелік іс-шара концерттік бағдарламамен жалғасып, қатысушыларға көтеріңкі көңіл күй мен жарқын әсер сыйлады. Бұл күн алғашқы курс студенттері, профессор-оқытушылар құрамы және университет қауымдастығы үшін маңызды оқиғаға айналды. КРМУ-ға қош келдіңіздер! Студенттік жылдарыңыз жаңа мүмкіндіктерге, жарқын жетістіктерге және кәсіби дамуға толы болсын! Болашақ дәрігерлерге таңдаған мамандықтарына деген адалдық, табандылық және үлкен жетістіктер тілейміз!