Қазіргі заманғы өнер музейіне экскурсия

2025 жылғы 27 қыркүйекте анатомия кафедрасының оқытушысы, 219А және 219Б топтарының кураторы — Татаринова Г.Ш. «Медицина» факультетінің студенттері үшін Алматыдағы Қазіргі заманғы өнер музейіне танымдық экскурсия ұйымдастырды.

Бұл экскурсия студенттердің эстетикалық талғамын, креативті ойлау қабілетін және кең дүниетанымын дамытуға бағытталған мәдени-ағартушылық жұмыстың маңызды бөлігі болды. Бұл қасиеттер болашақ дәрігердің кәсіби әрі тұлғалық үйлесімді дамуы үшін аса қажет.

Экскурсия барысында студенттер қазіргі заманғы өнердің негізгі бағыттарымен танысып, Қазақстанның XX ғасыр суретшілерінің туындыларын, сондай-ақ Ричард Серра, Билл Виола, Яёи Кусама сынды әлемдік деңгейдегі әйгілі шеберлердің жұмыстарын тамашалады. Мағынасы терең, символдарға толы өнер туындыларымен кездесу — мәдениеттің адам өміріндегі рөлі мен ғылым мен шығармашылықтың тоғысуы туралы терең ойларға жетеледі.

Студенттерге ерекше әсер қалдырған — ашық аспан астындағы мүсіндер паркі болды. Мұнда халықаралық суретшілердің туындылары табиғи және архитектуралық кеңістікпен үйлесе орналасқан. Бұл – қазіргі заманның бейнелеу тілі арқылы шындықты қайта пайымдауға шабыт беретін, өнер мен көрерменнің түйіскен тірі кеңістігі.